Ба кӯйи мо гузар кун

Эй шом, ба кӯйи мо гузар кун!

Эй субҳ, ба ҳоли мо назар кун!

Дар зулмати шаб танам бифарсуд,

Ё Раб, шаби зулматам саҳар кун!

Эй боди сабо, бигӯ ба ёрам,

Бар куштаи хештан гузар кун!

Гар кушта шудам ба доғи ҳаҷрат,

Худро бари теғи ӯ сипар кун!

Аз зулфи камонкашаш бипарҳез,

В-аз новаки ғамзааш ҳазар кун!

Эй дил, чу намерасӣ ба мақсуд,

Дам даркашу қисса мухтасар кун!

Ҳофиз, агарат ҳавои васл аст.

Бархез зи ҷову тарки сар кун!

Муаллиф: Ҳофизи Шерозӣ

---

---