Ба осмон пардохтам ман

Ту кори Заминро накӯ сохтӣ,

Ки бо осмон низ пардохтӣ?

                                                                                                Саъдӣ

Бале, бо осмон пардохтам ман,

Фалак аз ҷуръатам гардид ҳайрон!

Маро дар ин сафар ҳамроҳу ҳамкор,

Тавоно офтоби ақли Инсон…

 

Бихоҳам, ки ба даст орам ба ёриш

Дили сӯзони Хуршеди ҷаҳонро

Ба теғи илму ҳикмат пора карда,

Кушоям рози оташбори онро.

 

Фалакро нотавону мот созам,

Набардорад ба қасдам сар дигар бор.

Расонам дасти худ бар чархи гардун,

Бифармоям, ,ки бо амрам кунад кор…

 

Бале, бо осмон пардохтам ман,

Валекин такягоҳи ман замин аст.

Бихоҳам, ки шавад кораш накӯтар,

Мурод аз кушиши ман хам хамин аст.

Муаллиф: Мирсаид Миршакар

---

---