ГУЛИ НОЧИДА

Чашми сиёҳе доштӣ,
Ҳусни илоҳӣ доштӣ.
Месӯхтӣ ҷони маро,
Барқи нигоҳе доштӣ.
Ҳайф аз гули ночидаам,
Аз ишқи новарзидаам.
Ишқи ман андар сина монд,
Дар сина чун ганҷина монд.
Хокистаре андар дилам
Аз оташи дерина монд.
Ҳайф аз гули ночидаам,
Аз ишқи новарзидаам.
Дил гоҳ исёне кунад,
Арзи пушаймонӣ кунад.
Ку он баҳоре, ки ба сар
Моро гулафшонӣ кунад?…
Ҳайф аз гули ночидаам,
Аз ишқи новарзидаам.
1982

Муаллиф: Лоиқ Шералӣ

---

---