Ватан

Эй миллати хобида. бистезу талоше кун!
Эй қавми ҷафодида, бистезу талоше кун1
Эй охи гиреҳхурда дар ҳанҷараи таърих,
Эй ҷони ҳаросида, бистезу талоше кун!
Ганҷинаи ту бурданд, накдинаи ту хурданд,
Эй соҳиби тарсида, бистезу талоше кун!
Рангат шуда берангӣ, ҳангат шуда беҳангӣ,
Санги натарошида, бистезу талоше кун!
Аъмоли ту беҳуда, ишколи ту накшуда,
Эй махзани пошида, бистезу талоше кун!
Олуда ба ҳар гарде, печида ба ҳар дарде,
Бо хеш напечида, бистезу талоше кун!
Дарёи равон дорӣ, дилҳои ҷавон дорӣ,
Бонги касе нашнида, бистезу талоше кун!
Эй дори табархурда, озурдаву пажмурда,
Эй дасти наёзида, бистезу талоше кун!
Эй тахти сияҳтахта, худ соҳиби тахтат бош,
Эй доди наварзида, бистезу талоше кун!
1991

Муаллиф: Лоиқи Шерали

---

---