Ранҷидан
Зи ман ранҷидаӣ, сайёди хуши ман кӣ хоҳад шуд?
Қалиди қуфли лабҳои хамӯши ман кӣ хоҳад шуд?
Лаби лаъли худ аз пурсидани аҳволи ман бастӣ,
Ҳарифи сурмаи овози гӯши ман кӣ хоҳад шуд?
Ба сад ҷон мехаридам бода аз майхонаи чашмат,
Ба рӯям бастӣ ин дар, майфӯруши ман кӣ хоҳад шуд?
Чу гул, дар сина пинҳон буда аз васли ту рози ман,
Рабудӣ доман аз каф, пардапӯши ман кӣ хоҳад шуд?
Ба чонам шӯрише, чун Сайидо, афгандиву рафтӣ,
Ту худ баргӯ забонбанди хурӯши ман кӣ хоҳад шуд?
Шарҳи худро нависед
